ស្រីៗត្រូវដឹង! បើអ្នកដាក់ចិត្តស្រឡាញ់បុរសណាម្នាក់
នៅពេលដែលយើងស្រឡាញ់នរណាម្នាក់ តើយើងអាចទទួលយក និងយល់ពីគាត់បានកម្រិតណា ពេលខ្លះ មនុស្សប្រុស ក៏ចង់បានការយល់ចិត្តពីយើងច្រើនផងដែរ។ ខាងក្រោមនេះ ជាអ្វីដែលមនុស្សស្រីគួរដឹង និងឈ្វេងយល់ពីមនុស្សដែលអ្នកស្រឡាញ់ ៖
១. ត្រូវយល់ច្បាស់ពីមនុស្សម្នាក់នោះ
មនុស្សគ្រប់រូប មិនអាចល្អបំផុត ឬល្អឥតខ្ចោះនោះទេ គេក៏មានចំណុចមិនល្អ ឬក៏ចំណុចខ្វះខាតដែរ ហើយក៏មានចំណុចខ្លះ គេអាចនឹងប្រួលប្រែផ្លាស់ប្ដូរនៅថ្ងៃណាមួយ គេមិនអាចឋិតថេររហូតនោះឡើយ។ ហើយមិនមែនគ្រប់មនុស្សទាំងអស់ សុទ្ធតែអាចអត់ធ្មត់នឹងយើងបានគ្រប់រឿង គ្រប់ពេលនោះទេ ជួនកាល គេក៏ចេះខឹង ចេះអន់ចិត្តនឹងយើងដូចគ្នា អារម្មណ៍គេ ក៏អាចនឹងប្រែប្រួលទៅគញរប់ពេលដូចយើងអ៊ីចឹង។
២. ផ្ដល់សេរីភាព
ផ្ដល់សេរីភាពឱ្យគាត់ ព្រោះធម្មតាមនុស្សប្រុស អាចនឹងត្រូវការសេរីភាពច្រើន ផ្ដល់សិទ្ធឱ្យគាត់បានធ្វើនូវអ្វីដែលគាត់ចូលចិត្ត ដូចជាការលេងហ្គេម ឬលេងកីឡាជាដើម កុំចេះតែតាមគាត់ស្អិតមិនព្រមលែង ចេះតែសួរនាំ គ្រប់គ្រង ឃុំឃាំងគាត់ ធ្វើដូចជាគាត់ជាកូនក្មេង ឬខ្ញុំបម្រើ កូនចៅរបស់យើងឱ្យសោះ មនុស្សត្រូវការសិទ្ធស្មើគ្នា យើងមិនអាចទៅត្រួត្រាលើគេរហូតនោះទេ។
៣. យកចិត្តទុកដាក់ចំពោះគាត់
យកចិត្តទុកដាក់ ខុសពីការតាមដាន និងសង្ស័យ ត្រូវចេះសួរនាំ សុខទុក្ខរបស់គាត់ ដោយការបារម្ភ ស្រឡាញ់ មិនមែនចង់ដឹងរឿង ចាប់ថ្នាក់គាត់នោះទេ។ ពេលខ្លះ ត្រឹមសំណួរសួរគាត់ថា ញ៉ាំបាយនៅ? កំពុងធ្វើអ្វី? នៅណា? ទៅផ្ទះជិះប្រយ័ត្នប្រយែង ... ប៉ុណ្ណេះ គេហៅថាការយកចិត្តទុកដាក់ហើយ។
៤. គោរព និងឱ្យតម្លៃ
អ្នកត្រូវចេះគោរពរាល់ការសម្រេចចិត្ត និងអ្វីដែលគាត់បានជ្រើសរើស ឱ្យតម្លៃ និងលើកទឹកចិត្តដល់គាត់ មិនថានៅចំពោះមុខ ឬក្រោយខ្នងទេ ក៏មិនត្រូវយកគាត់ទៅប្រៀបជាមួួនឹងអ្នកដទៃនោះឡើយ។
៥. ជឿជាក់លើគាត់
ស្រឡាញ់កុំសង្ស័យ តែបើសង្ស័យកុំស្រឡាញ់ បើអ្នកស្រឡាញ់គាត់មែន អ្នកត្រូវតែជឿជាក់ និងទុកចិត្តមនុស្សដែលអ្នកស្រឡាញ់ ការសង្ស័យ គឺនាំតែបញ្ហា ការឈ្លោះទាស់គ្នាតែប៉ុណ្ណោះ ម្ល៉ោះហើយ បោះចោលឱ្យអស់ទៅ កុំសង្ស័យគ្នាច្រើនពេក មិនសប្បាយទេ។
៦. ធ្វើឱ្យគាត់ជឿទុកចិត្តអ្នក
វាក៏ដូចគ្នា ពិតជាសំខាន់ណាស់ ដែលយើងគប្បីធ្វើឱ្យគាត់ជឿជាក់ និងទុកចិត្តលើយើង ថាយើងមានតែគាត់ម្នាក់ ស្មោះត្រង់ និងស្រឡាញ់គាត់ដោយស្មោះ មិនទៅពាក់ព័ន្ធ រញ៉េរញ៉ៃនឹងអ្នកដទៃណាម្នាក់នោះឡើយ។ សូម្បីតែជាមួយមិត្តភក្តិ ក៏យើងអាចបញ្ជាក់បានថា វាត្រឹមតែជាមិត្ត មិនមែនលេងសើចផ្ដេសផ្ដាស នាំឱ្យគាត់សង្ស័យ កើតការមិនទុកចិត្ត។
អ្នកត្រូវដឹងថា មិនមាននរណាម្នាក់ល្អឥតខ្ចោះនោះឡើយ ពេលខ្លះ គាត់អាចនឹងធ្វើឱ្យអ្នកខឹង អន់ចិត្ត ឬខកបំណង ព្រោះគាត់មិនអាចក្លាយជាមនុស្សដែលដូចនូវអ្វីដែលអ្នករំពឹងទុក ប៉ុន្តែប្រសិនបើអ្នកស្រឡាញ់គាត់ អ្នកក៏ត្រូវតែព្រមទទួលយកគ្រប់ផ្នែកនៃគាត់ តែក៏ត្រូវតែមើលផងដែរថា គាត់សក្តិសមនឹងឱ្យអ្នកលះបង់ និងផ្ដល់ឱ្យគាត់នូវចំណុចអស់ទាំងហ្នឹងទេ។ បើមិនសមនឹងតម្លៃទេ អ្នកកុំព្យាយាមបន្ទាបបន្ថោកខ្លួនឯងអី ព្រោះអ្នកក៏មានតម្លៃគ្រប់គ្រាន់ ដែលសមទទួលបានការគោរព និងថ្នាក់ថ្នមដូចគ្នា។
ចំណាំ! យើងចង់បានការស្រឡាញ់ ថ្នាក់ថ្នម យល់ចិត្តពីមនុស្សដែលយើងស្រឡាញ់ប៉ុនណា គេក៏ចង់បានការត្រឡប់ពីយើងទៅវិញប៉ុណ្ណឹងដូចគ្នា៕
ព័ត៌មានថ្មីៗ
