២០២៤ ឆ្នាំ ២ មហាសំណាងផុតលេខ តែអ្នកកើតឆ្នាំ ១ នេះអាចចាយច្រើនជាងចំណូល
ឆ្នាំថោះ ទើបចូលថ្មិថ្មោង តែយើងប្រមើលមើលជាបណ្តើរៗទៅកាន់ឆ្នាំរោង ឆ្នាំ ២០២៤ ខាងមុខ តាមអ្នកជំនាញផ្នែកហោរាសាស្រ្តបានគន់គូរមើលឃើញថា អ្នកកើតឆ្នាំទាំង ២ នឹងមានរាសីឡើងខ្ពស់ត្រដែត តែទន្ទឹមនោះ ម្ចាស់ឆ្នាំ ១ គឺអាចមានចំណាយច្រើនជាងចំណូល ជីវិតរាងជួបការលំបាកបន្តិច៖
អ្នកកើតឆ្នាំកុរ – ជ្រូក
តាមហោរាសាស្រ្តនៅឆ្នាំ ២០២៤ ខាងមុខ អ្នកកើតឆ្នាំកុរ នឹងដូចមានព្រះតាមថែរក្សា ទៅណាមកណា មានគេសង្រ្គោះជាប់ជានិច្ច មិនឲ្យធ្លាក់ចូលរណ្តៅនៃគ្រោះឡើយ។ នៅដើមឆ្នាំ អាចថាមានសំណាងតិចតួច ក៏ប៉ុន្តែចូលដល់ល្បាក់ដំណាច់ឆ្នាំតទៅ នឹងដូចត្រូវឆ្នោតរង្វាន់ធំ អាចមានលុយទិញផ្ទះ ទិញឡានថ្មី។
អ្នករកស៊ី នឹងបានចំណេញច្រើន រីឯអ្នកប្រកបការងារ នឹងបានមេកើយដំឡើងប្រាក់ខែជូន ហើយក៏អាចទទួលបានឱកាសភ្លឺស្វាងជាងមុនក្នុងជីវិត។ បំណងប្រាថ្នាអ្វីក៏នឹងសម្រេចបានផ្លែផ្កា កើតក្លាយជាការពិត ល្មមឲ្យមនុស្សនៅក្បែរខ្លួន មានការច្រណែននឹងជីវិតអ្នកមិនខានឡើយ។
អ្នកកើតឆ្នាំរោង - នាគ
ម្ចាស់ឆ្នាំផ្ទាល់ គឺឆ្នាំរោង ក៏មានសញ្ញារាសីចក្រឡើងខ្ពស់ អាចទទួលបានលាភសំណាង រាប់ជាមហាសំណាងធំផុតលេខ ក្នុងជីវិត។ រង្វិលជុំផុតអស់ ១២ ឆ្នាំសម្រាប់អ្នកកើតឆ្នាំរោង ដែលរមែងជាមនុស្សមានភាពឈ្លាសវៃ រហ័សរហួន ចេះដាក់ខ្លួន គឺដល់វេលាសោយសុខហើយ សម្រាប់ឆ្នាំ ២០២៤ ខាងមុខ។
មនុស្សនេះ មានភាពច្បាស់លាស់ក្នុងការងារ ការរកស៊ី ដូច្នេះគួបផ្សំសំណាងចូលមកដល់ផង ក៏អាចនាំឲ្យពួកគេ ទទួលបានផលធំ ដូចផ្លាស់ជីវិត ១៨០ ដឺក្រេ នាំឲ្យជួបតែចម្រុងចម្រើន ជួបតែសុភមង្គលពេញលេញ។
អ្នកកើតឆ្នាំជូត – កណ្តុរ
ជាឆ្នាំដែលរាសីមិនសូវល្អទេ នៅឆ្នាំ ២០២៤ ខាងមុខ ពោលអាចមានចំណាយច្រើនជាងចំណូល។ ការប្រឈមមុខនឹងបញ្ហាអាចជាមានច្រើន ការលំបាកអាចនឹងជួបប្រទះជាបន្តបន្ទាប់ ដោយសារហេតុផលផ្សេងៗពីគ្នា។
ផែនការណ៍ក្នុងជីវិត ដែលគ្រោងនឹងសម្រេចឲ្យបាន ក៏មិនក្លាយជាផលនោះដែរ តែវាបែរក្លាយជាគ្រោះបន្ថែមទៀត។ តែយ៉ាងណាបើអ្នកអត់ធ្មត់បន្តិច ខិតខំឆ្លងឲ្យផុតឧបសគ្គចំពោះមុខ ត្រឹមតែរយៈពេលជាងប៉ុន្មានខែប៉ុណ្ណោះ យីអ៊ុនម្ចាស់ឆ្នាំជូតនឹងរះត្រដែតឡើងមកវិញជាមិនខាន៕
ប្រភព៖ បរទេស | ប្រែសម្រួល៖ ក្នុងស្រុក
ព័ត៌មានថ្មីៗ
